Sempre con nós.

Nós,
cando marchamos
deste mundo,
non volvemos á terra
porque nunca fomos parte da terra.

Nós pertencemos ao mar,
fundímonos co mar,
convertímonos en salitre.

A nosa forza,
pola que pagamos aluguer ás ondas,
volve a bater con forza contra as rochas
cando volvemos ao mar.
A calma dos nosos ollos
luce de novo nas augas mansas.

Cando nos vamos...
nunca nos vamos de todo.

Sempre que alguén mira ao mar,
as lembranzas daquelas que se foron,
cobran vida ao seguir o rastro da escuma.

Por iso,
aínda que xa partiches,
estarás
sempre con nós.